ILOILO CITY – Magapatigayon sang condemnation rally ang Bagong Alyansang Makabayan (Bayan)-Panay batok sa palpak nga P680-million Ungka Flyover sa Martes, Mayo 23 umpisa las 5:00 sang hapon malapit sa flyover.
Sa interview sang Bombo Radyo kay Elmer Forro, secretary general sang nasambit nga grupo, iya ginpahayag nga gina-abi-abi niya ang tikang sang iban pa nga mga progresibo nga grupo sa pagpamatok sa huol nga natuga sang depektibo nga flyover.
Isa na diri ang tikang ni Iloilo City Councilor Plaridel Nava nga magapasaka sang kaso sa paglapas sa Republic Act 3019 ukon Anti-Graft and Practices Act kag Gross Neglect of Duty sa kontraktor nga International Builders Corporation kag opisyales sang Department of Public Works and Highways.
Suno kay Forro, ginatun-an na niya ang pagpasaka sang kaso kun sa diin posible nga makig-angot ini kay Nava ukon ano man nga lihuk agud mahatagan sang hustisya ang publiko nga naperwisyo.
Ginpahayag dugang sang natungdan nga nagakinahanglan sang may manabat sa pagtuga sang huol sa mga pumuluyo agud indi na maliwat pa ang kaangay nga insidente.
