Nagpatigayon sang protesta subong nga adlaw, Marso 31, ang BAYAN Panay nga gintawag sang mga ini nga ”Kalbaryo sang Pumuluyo”
Ini kaangot sa gihapon sa kabudlayan nga naagyan sang mga pumuluyo ilabi na ang mga drivers kag operators nga nagaka-eksperyensya sang mataas nga bili sang gatong.
Sa amo nga protesta, nagpas-an man sang krus ang mga nag-upod sa aktibidad.
Sa interview sang Bombo Radyo kay Elmer Forro, Secretary General sang BAYAN Panay, iya ginpahayag nga ini nga protesta ginpaangid nila sa kabudlayan nga naagyan ni Hesus samtang nagapas-an sang krus.
Suno pa sa iya nga indi makaigo ang ginahatag sang gobyerno nga assistance kag kulang pa ang ginahimo nga mga tikang ni President Ferdinand Marcos Jr. ilabi na nga nagapabungol-bungol lang ini sa panawagan nga ibasura ang Oil Deregulation Law kag magpatuman sang price control sa mga produktong petrolyo.
Nagpanawagan man ang mga ini nga dapat untaton na sang Estados Unidos ang pagpang-atake sa mga pungsod kun sa diin ginakuha ang mga natural resources kaangay sang langis.
Dugang pa ni Forro nga dapat kuhaon na ang excise tax kag value-added tax agud nga indi na tuman nga mabudlayan ang mga pumuluyo.
