ILOILO CITY- Nagakahangawa si Iloilo 2nd District Board Member June Mondejar nga mahimo maapektuhan ang mga pasyente sang Western Visayas Sanitarium and General Hospital sa mga alegasyon nga may mga empleyado nga wala sang may ginabaton nga sweldo sa sulod sang tatlo ka bulan.
Sa privilege speech nga gin-deliver ni Board Member Mondejar sa Sangguniang Panlalawigan, iya ginpahayag nga kun matuod nga tuman ka delayed ang sweldo sang mga healthcare workers, dako ang posibilidad nga maapektuhan man ang ila nga trabaho kag amo man ang mga pasyente sang ospital nga ginahatagan sang serbisyo.
Suno kay Mondejar, indi nagakadapat nga madugangan pa ang pag-antus kag kabudlay nga nabatyagan sang mga pasyente bangud sa indi epektibo nga serbisyo sang ospital.
Magluwas sa problema sa sweldo kag benepisyo, may nakalab-ot man nga impormasyon sa natungdan nga ginaalegar guba ang elevator sang ospital sa diin anom na ka bulan nga wala ini naga-function, ang mga hospital equipment kag facilities ang wala mapakay-o, kag kun kaisa wala man sang hospital supplies nga mahimo magamit kaangay sang bandage, gunting, alcohol kag iban pa.
Nagalaum ang board member nga mangin palaagyan sila agud nga masolbar ang problema sa sulod sang Western Visayas Sanitarium and General Hospital.
