ILOILO CITY- Ginakabig ni Iloilo 4th District Board Member Rolando Distura ang natabo nga power blackout sa Panay bilang senyales agud mag-invest ang mga komunidad sa renewable energy sources.
Sa interview sang Bombo Radyo kay Board Member Distura nga amo ang author sang Iloilo Provincial Ordinance of Renewable Energy Ordinance of 2022 (I-PORE 2022) nga naghimo sa Iloilo bilang pinakauna nga local government unit nga nagpasar sang kaangay nga ordinansa, iya ginpahayag nga indi dapat magsalig ang probinsya sa isa lang ka source sang elektrisidad bangud sa tion sang power outage, dako gid ang pierdehon sang madamo nga sektor ilabi na ang negosyo.
Ginkalipay naman ni Distura nga diri sa Iloilo, nagbunga ang iya ginduso nga ordinansa bangud nga may mga ospital na nga nagagamit sang solar panels sa ila operasyon nga amo ang Iloilo Provincial Hospital kag Aleosan District Hospital.
Nahibaluan nga nasaad sa amo nga ordinansa nga ang mga government facilities kag mga eskwelahan amo ang prayoridad nga mabutangan sang solar panels.
Matandaan nga sang nagluntad ang power blackout, madamo nga mga eskwelahan ang apektado kag napilitan nga magsuspend sang klase.
Samtang, ginpakigbahin naman ni Distura nga may tatlo na ka mga kompaniya ang nagaplano nga magtukod sang solar farms sa Iloilo nga amo ang One Renewable Energy Enterprise, Inc. nga may capacity nga 170 MW, Solaris, Inc.-Palm Concepcion Power Corp. nga may capacity nga 135 MW, kag ang isa pa ka energy company ang nagaplano magtukod sang 186-MW solar farm.
