ILOILO – Nagakabalaka ang pumuluyo ilabi na ang mga ginikanan sa Brgy. Manhayang, Sta Barbara, Iloilo ang nagataas nga kaso sang depresyon kag paghikog sa mga pamatan-on.
May kaangtanan diri, gintutukan sang mga barangay official ang nasambit nga problema paagi sa pagpatigayon sang isa ka programa sa bulig man sang Bombo Radyo agud mapahibalo ang mga pumuluyo natuhoy sa nasambit nga isyu.
Sa interview sang Bombo Radyo kay Ma. Isabel Arellano acting SK Chairman sang nasambit nga lugar, iya ginpahayag nga paagi man sa social media naimpluwensyahan ang mga pamatan-on kaangay na lang sang teenage pregnancy kag suicide.
Suno kay Arellano, paagi sa ginpatigayon nga programa kaupod ang Bombo Radyo, luyag man nila nga maathagan ang mga pamatan-on agud malikaw nga mangin biktima sang depresyon.
Ginpasalamatan man sang natungdan ang Bombo Radyo bangud paagi sa mga balita nga ginadul-ong nila adlaw-adlaw nagdamo ang ila impormasyon sa mga nagakatabo sa ila palibot kag sa sosyodad.
Samtang suno naman kay Punong Barangay Geronima Jaque sang nasambit nga barangay, tuman ang ila pagpasalamat sa Bombo Radyo bangud sa pagbulig sa pagpa-athag sa mga pamatan-on tuhoy sa nagakatabo sa sosyodad.
Dugang sang natungdan, ginasuportahan gid nila ang tanan nga katuyuan kag proyekto sang Bombo Radyo para sa mga pumuluyo ilabi na sa mga pamatan-on.
