DUEÑAS, ILOILO – Proud ang isa ka fan group sang Bombo Radyo Philippines nga nakapakigbahin sang bulig sa isa ka Ati Community sa Barangay Taminla, Dueñas, Iloilo.
Sa interview sang Bombo Radyo kay Ruth Valle, presidente sang Bombo Radyo Worldwide Barkadahan, iya ginpahayag nga ginpalab-ot ang bulig sa masobra 30 ka households sa amo nga barangay.
Ginpakigbahin sa Ati Community ang mga bugas, grocery packs, kag iban pa nga kinahahanglanon sa balay.
Ang gift-giving ang ginpatigayon kaupod ang local government unit sang Dueñas kag mga miyembro sang Philippine Air Force.
Lima ka miyembro sang Bombo Radyo Worldwide Barkadahan ang nag-upod sa amo nga aktibidad.
Nagalaum man ang natungdan nga mas madugangan pa ang mabuligan sang ila grupo nga subong ginabug-usan na sang masobra 4,000 ka mga miyembro — sa Pilipinas kag sa luwas sang pungsod.
