Ginpasugtan sang Sandiganbayan 3rd Division ang aplikasyon ni former Senator Bong Revilla nga makapyansa sa kaso nga malversation nga kaangot sa maanomaliya nga P92.8-million alleged ghost flood control project sa Pandi, Bulacan.
Ginkumpirma ini subong nga hapon ni Atty. Dennis Pulma, ang Third Division Clerk of Court.
Suno sa korte, gin-grant ang bail application bangud napaslawan ang prosekusyon nga mag-establisar sang mabakod nga ebidensya nga guilty si Revilla.
“In its Resolution, the Court granted the bail application of accused Ramon Bautista ‘Bong’ Revilla Jr. for failure of the prosecution to establish that the evidence of his guilt is strong, insofar as it pertains to the charge of malversation through falsification of public documents,” suno sa Sandiganbayan.
“Thus, the Court ordered the provisional release of accused Revilla upon posting of the required cash bond, unless he is being held for some other legal ground,” dugang sang anti-graft court.
Gin-set ang pyansa sa balor nga P1 million.
Denied naman ang bail application sang iya kaupod nga mga akusado nga mga opisyal sang Department of Public Works and Highways (DPWH) nga sanday Brice Hernandez, Jaypee Mendoza, Arjay Domasig, Emelita Juat, Juanito Mendoza, kag Christina Pineda.
Matandaan nga sang Enero, ginpasaka kanday Revilla ang kaso nga graft kag malversation bangud sang alleged ghost project.
Pending ang kaso nga graft sa 4th Division sang Sandiganbayan samtang yara naman sa third division ang kaso nga malversation.
Bangud nga bailable ukon pwede mapyansahan ang kaso nga graft, mahimo ma-release si Revilla kun makahatag na siya sang pyansa.
Una na nga nakapiyansa si Revilla sa kaso nga graft, apang nagpabilin siya sa detensyon bangud non-bailable ang kaso nga malversation; apang mahimo gihapon makapangayo sang piyansa ang akusado sa amo nga kaso paagi sa petisyon kaangay sang natabo kay Revilla.
