Ginarespeto sang Malacañang ang desisyon sang Sandiganbayan nga tugutan nga makapyansa si former Senator Bong Revilla.
Suno kay Communications Undersecretary Atty. Claire Castro, ang prosecutors ang magatumod sang nagakaigu nga legal remedy sa amo nga order.
“Nasa sa kamay ng Sandiganbayan ang pagpapasya sa mga ganiyang usapin. Nirerespeto ng administrasyon ang mga resolution o decision ng mga korte… Nasa kamay na rin po ng mga prosecutors kung ano ang nararapat na tamang aksyon o remedyo para sa nasabing Order o Resolution ng Sandiganbayan. Dapat lang laging manaig ang batas at ang proseso,” suno kay Castro.
Subong nga hapon, nagkadto na ang anay senador sa Sandiganbayan agud magbayad sang P1-million nga pyansa. Buot silingon sini, pagkatapos sang proseso sang pila pa ka dokumento, mahilway na siya sa presuhan.
Ang kaso sini nga malversation ang naangot sa maanomaliya nga P92.8-million alleged ghost flood control project sa Pandi, Bulacan.
Suno sa korte, gin-grant ang bail application bangud napaslawan ang prosekusyon nga mag-establisar sang mabakod nga ebidensya nga guilty si Revilla.
Denied naman ang bail application sang iya kaupod nga mga akusado nga mga opisyal sang Department of Public Works and Highways (DPWH) nga sanday Brice Hernandez, Jaypee Mendoza, Arjay Domasig, Emelita Juat, Juanito Mendoza, kag Christina Pineda.
Matandaan nga sang Enero, ginpasaka kanday Revilla ang kaso nga graft kag malversation bangud sang alleged ghost project.
Pending ang kaso nga graft sa 4th Division sang Sandiganbayan samtang yara naman sa third division ang kaso nga malversation.#
