ILOILO CITY – Nakadihon na sang ordinansa ang mga opisyal sa Brgy. Javellana, Jaro, Iloilo City may kaangtanan sa road clearing operations.
Sa interview sang Bombo Radyo kay Punong Barangay Emmanuel Ogacion sang nasambit nga barangay, iya ginpahayag nga gin-umpisahan nila ang paghimo sang amo nga ordinansa sang nagsugod man ang Oplan Hawan.
Ma-uti suno sa iya ang paghimo sini ilabi na bangud indi man madali-dali lang ang pagpapirma sa nanuhay-tuhay nga opisina apang suno kay Ogacion, nangin mapisan gid ang mga opisyal sa barangay agud matigayon ini ilabi na bangud isa ini sa mga requirements sang Department of the Interior and Local Government (DILG) sa evaluation.
Handa man si Ogacion nga ipakigbahin sa iban nga barangay ang kopya sang ila ordinansa agud himuon nila nga basehan.
Sa bahin naman sang nagapadayon nga validation sang City DILG, ginpahayag ni Ogacion nga yara na sa 80-90 percent ang ila pagpanghanda.
Ginpahayag man sang opisyal nga nalakip man ang bahin sang iya balay kag ang ila barangay hall sa mga ginpangguba samtang ginapatigayon ang road clearing operations.
Apisar sini, ginpahayag ni Ogacion nga bilang punong barangay, katungdanan niya nga ipakita sa iya mga pumuluyo nga nagasunod sila sa layi .
Kaangot diri, ginpahayag man ni Shan Eslabon, tanod commander sang Brgy. Javellana, Jaro, Iloilo City nga gina-istriktuhan gid nila ang pag-patuman sang ordinansa ilabi na sa illegal parking.
Indi manegar suno sa natungdan nga may yara sang mga pumuluyo nga salawayon gid kag may yara man nga nagapangakig pa sa tion nga tudluan sang insakto nga pag-park sang salakyan.
Apisar sini, ginpahayag ni Eslabon nga nahanas na sila sang maayo kun paano istoryahon sang matawhay ang mga tawo agud mapaintindi sa ila ang ila responsibilidad sa pagpakigbahin sa Oplan Hawan.
Apang, may kaangtanan sa ila katungdanan, mas maayo man suno sa natungdan kun i-deputize sila sang Public Safety and Transportation Management Office (PSTMO) sa pagdakop sa mga nagalapas sa pagsulundan.
