Daku ang paglaum sang Philippine Olympic Committee nga matigayon nga mapangunahan sang Barangay Ginebra import nga si Justin Brownlee ang men’s national basketball team agud maagaw ang gold sa Southeast Asian Games nga natalana na sa Mayo 5-17 sa Cambodia.
Suno kay Bambol Tolentino sang Philippine Olympic Committee, magapadala ang Samahang Basketbol ng Pilipinas sang mabaskog kag indi maasi-asi nga roster sa ika-32 nga edisyon sang SEA Games, kag posible nga si Brownlee ang manguna kun manaturalize na ini kag mahimo nga Philippine passport holder antes ang hampang sa Mayo.
Nahibaluan nga subong, pirma na lang ni Presidente Ferdinand ‘Bongbong’ Marcos ang kulang sa naturalization sang 34-anyos nga basketball star.
Kumpyansa si Tolentino nga daku ang mabulig sang 6-foot-6 Gin Kings’ import agud mabawi ang bulawan nga medalya apisar nga mahampang man ang iban nga mga pungsod nga may yara man sang naturalized players.
Matandaan nga sang nagligad nga SEA Games, napaslawan ang Pilipinas nga makuha ang kuntani ika-14 na nga sunod-sunod nga gold medal sa basketball sa amo nga biennal meet matapos nalutos ini sa Indonesia sa skor nga 85-81.
Sa labing una nga tion halin sang 1989, silver ang nakuha sang Gilas sa baylo nga gold.
Magluwas sa SEA games, yara man si Brownlee sa away sang Gilas batok sa Lebanon sa Pebrero 24 kag batok sa Jordan sa Pebrero 2 sa final qualifying window sang Fiba World Cup 2023 nga lunsay patigayunon sa Philippine Arena.
