Wala napaslawan nga makasulod sa Top 3 ang bugal sang Barangay Ravina, Sibunag, Guimaras nga si Kimberly Clark matapos nagpasundayag sa Miss Filipina International 2021.
Ginpatigayon ang coronation night sa Redondo Beach Performing Arts Theater, sa California.
Diri kag naangkon sang Guimaras beauty ang 2nd runner up nga title.
Sa interview sang Bombo Radyo kay Beniel Frank Aspero, anay manunudlo ni Clark sa Holy Rosary Academy sa Nueva Valencia, Guimaras, iya ginpahayag nga yara na sa senior high school ang iya former student sang ginpadayon sini ang pag-eskwela sa Estados Unidos.
Suno kay Aspero, sang na-qualify ang 20 anyos nga si Clark para sa Miss Filipina International pageant, nagbalik siya sa Pilipinas para sa iya training.
Dugang pa niya, dako na nga dungog para sa Guimaras nga nakuha ni Clark ang 2nd runner up nga pwesto ilabi na nga first time sini mag-intra sa isa ka international pageant sa iya nga edad.
