Cayetano: ‘Pantay-pantay ba ang hustisya o selective justice tayo?’

Ginkwestyon ni Senate Minority Leader Alan Peter Cayetano kun patas gid man ang administrasyon ni President Ferdinand “Bongbong” Marcos Jr. sa pagpangusisa sang mga kaso.

Ginpahayag ini ni Cayetano sa iya nga Kontra Sona nga gin-deliver sa Senado isa ka adlaw matapos ang State of the Nation Address (SONA) ni Marcos.

Suno kay Cayetano, si Marcos indi lamang presidente sang administrasyon kundi presidente man sang oposisyon.

Ginapatuhuyan sini ang pahayag ni Marcos sa iya SONA nga indi siya presidente sang iya pamilya ukon mga abyan, kundi presidente sang Pilipinas.

Ginmensyonar ini ni Marcos sang gin-anunsyo niya nga ipasaka na sang Ombudsman ang sampaw-sampaw nga kaso batok sa iya pakaisa nga si former House Speaker Martin Romualdez nga ginaalegar may kaangtanan sa kontrobersiya sa flood control projects.

Suno kay Marcos: “Masakit man sa akin ito, ngunit kailangan nating gawin ang tama. Hindi ako pangulo ng aking pamilya, hindi ako pangulo ng aking kaibigan. Ako ay pangulo ng Pilipinas…”

Ginbalikan naman ni Cayetano ang sitwasyon sang iya kaupdanan nga mga senador.

Nalagyo si Senador Ronald “Bato” dela Rosa suno sa iya bangud wala sang patas nga hustisya, samtang gintawag niya naman nga “political prisoners” sanday Senador Jinggoy Estrada kag Rodante Marcoleta.

“I believe that Sen. Bato [dela Rosa] is fleeing unjustly because he cannot get justice. I believe Sen. Jinggoy [Estrada] and Sen. [Rodante] Marcoleta are political prisoners and that… if it wasn’t weaponized, they will be able to at least go out on bail,” suno sa minority leader.

Diri na kag ginkwestyon sini kun may hustisya bala para sa mga senador nga ini ukon may selective justice lamang sa pungsod.

“Sabihin n’yo na mali ako, but should they be allowed to attend the impeachment?” pamangkot sini. “Sabihin n’yo na mali ako and they’re not political prisoners, but are they getting the justice? Pantay-pantay ba ang hustisya o selective justice po tayo ngayon?”

Ginpangabay man ni Cayetano nga tapuson ang imbestigasyon sa flood control scandal kag ipatuman ang matuod-tuod nga reporma agud mapunggan ang padayon nga kultura sang korapsyon.

“So sana, we will find the strength and wisdom to conclude the investigations, to hold people accountable, but also to put the genuine reforms,” pahayag sini.#