Ginpakamalaot ni Presidente Rodrigo Duterte ang nagakatabo sa party-list system sa Kamara bangud ginapahayag ginagamit ini sang milyonaryo nga mga tawo agud iduso ang ila personal nga interes sa Kongreso.
Suno sa presidente, ang party-list system kuntani ang mekanismo agud mahatagan sang tingog ang mga “underrepresented” nga sektor sa Kamara, apang ang natabo, gina-abusuhan ini sang mga manggaranon.
Sa iya speech sa Batangas City, ginbuyagyag man sang presidente nga may naga-agaway ang mga milyunaryo sang party-list kag iban sa ila ang nagabakal mismo sang party-list.
Kasunod sini, nanawagan si Duterte nga amyendaran ang 1987 Constitution nga amo ang nag-establisar sang party-list system.
Ginhingyo sini sa mga mamalidha nga magtukod sang Constitutional Assembly (ConAss) ukon Constitutional Convention (ConCon) agud nga masolusyunan ini nga problema.
Antes sini, may pila ka party-list groups nga ginpakamalaot ni Duterte bangud sa ginapahayag kaangtanan sa komunista nga grupo.
