Nag-file ang China sang counter diplomatic protest batok sa Pilipinas bangud sa ila gin-alegar “intrusion, disinformation, kag provocative” nga mga tikang sa West Philippine Sea nga nagbutang sa barko kag personnel sang China Coast Guard sa katalagman.
Suno kay Chinese Ministry of Foreign Affairs spokesman Mao Ning, ang Pilipinas ang dapat basulon sa “recent emergencies” sa Bajo de Masinloc ukon sa Scarborough Shoal kag sa Ren’ai Jiao ukon Ayungin Shoal.
“I need to stress that Ren’ai Jiao is part of China’s Nansha Qundao. China has indisputable sovereignty over Nansha Qundao, including Ren’ai Jiao, and their adjacent waters,” pahayag ni Mao.
Antes sini, ginpatawag sang Department of Foreign Affairs (DFA) si Chinese Ambassador to Manila Huang Xilian agud nga ihatag sa iya ang diplomatic protest sang Pilipinas bangud sa pagbomba sang China sang water cannon sa mga barko sang pungsod sa West Philippine Sea sang nagligad nga Disyembre 9 kag 10.
Apang suno kay Mao, ang ugat sang problema amo ang Pilipinas nga wala nagtuman sang promisa sini kag nagapamalibad nga kuhaon ang “illegally grounded warship” sa reef. Ang ginatumod sini amo ang BRP Sierra Madre nga yara sa Ayungin Shoal.
Pahayag pa sang opisyal, hugot nga ginabalabagan sang China ang tuyo sang Pilipinas nga okuparon ang Ren’ai Jiao paagi sa pagpadala sini sang construction materials sa BRP Sierra Madre.
“The root cause is that the Philippines has broken its promise and refused to tow away the illegally grounded warship at the reef and attempted to reinforce it on a large scale in an attempt to permanently occupy Ren’ai Jiao.”
Ginpasibangdan pa sang spokesman nga nagapalapta sang sala sala nga impormasyon ang Pilipinas sa pagwaragwag sa amo nga insidente.
Naghingyo pa ini sa Pilipinas nga untaton na ang pagpang-garit-garit kag pagguba sang kalinong sa amo nga teritoryo. “We once again urge the Philippines to stop infringing on China’s sovereignty and making provocative moves, stop groundlessly attacking and smearing China, and avoid undermining peace and stability in the South China Sea,” pahayag sini.
Dugang pa sang spokesperson: “We will continue to do what is necessary in accordance with domestic and international laws to resolutely respond to provocative moves that infringe on China’s sovereignty and defend our territorial sovereignty and maritime rights and interests.” ##
