Nagpaguwa ang Court of Appeals (CA) sang freeze order sa assets ni former House Speaker kag incumbent Leyte 1st District Representative Ferdinand Martin Romualdez.
Ginsapubliko ini ni Ombudsman Jesus Crispin Remulla subong nga adlaw, Abril 25.
“Si former Speaker Martin Romualdez, na-freeze na ‘yung kaniyang…, may freeze order na. From Court of Appeals kasi doon talaga dinadala ang freeze orders ng AMLC. Diyan talaga pinakukuha ng court order,” suno sa Ombudsman.
Matandaan nga kahapon, ginkumpirma sang Anti-Money Laundering Council (AMLC) nga naka-secure ini sang freeze order para sa assets sang wala ginhingadlan nga indibidwal. Ginlaragway ini sang AMLC nga prominente nga incumbent legislator nga ginaalegar nga involved sa flood control corruption scandal.
Subject man sang freeze order ang business associate kag ang corporate entity nga ginaangot man sa flood control project anomalies.
Suno sa anti-dirty money body, sakop sang freeze order ang 25 bank accounts kag 10 ka insurance policies nga rehistrado sa idalom sang pangalan sang amo nga mamalidha.
Magluwas diri, covered man sang order ang 27 ka bank accounts, 10 ka insurance policies, kag isa ka investment account sa idalom sang pangalan sang ginaalegar nga business associate sang kongresista; kag duha ka bank accounts, pito ka property accounts, kag isa ka real estate property nga rehistrado naman sa idalom sang pangalan sang corporate entity.
Suno sa AMLC, nakitaan sang Court of Appeals sang probable cause nga i-link ang assets sa plunder, sa Direct and Indirect Bribery, kag sa violations sang Anti-Graft and Corrupt Practices Act.#
