Ginbuyagyag sang opisyal sang Armed Forces of the Philippines (AFP) nga ginhambalan sang China Coast Guard (CCG) ang Pilipinas nga isa lang ka barko ang ila tugutan nga makalab-ot sa BRP Sierra Madre sa Ayungin Shoal.
Natabo ini sang nagligad nga resupply mission sang Martes, Marso 5.
Suno kay AFP Western Command chief Vice Admiral Alberto Carlos, sang ginradyo ini sang China sa barko sang Pilipinas nga Unaizah May 4, ginkonsiderar naman ini sang Navy nga isa lamang ka probokasyon kag wala nila ginsapak; sa baylo, ginpadayon nila ang misyon.
Nalakip mismo si Carlos sa mga nakasakay sa amo nga resupply vessel nga sang ulihi ginbombahan na sang tubig sang duha ka barko halin sa China.
Apat ka mga Navy personnel ang nakaangkon sang minor injuries sa amo nga insidente lakip si Carlos nga nasamaran sa iya nga tudlo.
Suno kay Carlos, sang nagpaandam ang China, standard nga radio reply ang ginpahuni sang barko sang Pilipinas bangud ginapanindugan man nila nga isa ini ka lehitimo nga mission kag teritoryo pa sang Pilipinas ang Ayungin Shoal bangud sulod ini sa exclusive economic zone sang pungsod.
Kasunod sang amo nga hitabo, nakaangkon sang minor damage ang Unaizah May 4 nga amo ang pinakadaku nga resupply boat sang Pilipinas para sa BRP Sierra Madre nga naka-estasyon sa Ayungin Shoal halin sang 1999.
Una na nga ginpasalig sang militar nga gamiton nila gihapon ang Unaizah May 4 sa masunod nga misyon sa amo nga shoal kun sa diin nagahulat ang tropa sang militar.#
