Gintawag sang People’s Republic of China nga isa ka akto sang “pagpang-bully” ang ginaduso nga i-ban ang bantog nga Chinese-owned application nga TikTok sa Estados Unidos sang Amerika.
Ginpahayag ini sang Chinese foreign ministry kasunod sa pagbinotohay sang US House of Representatives nga amo ang maga-pwersa sa tag-iya sang TikTok nga ByteDance nga ibaligya ang short video app sa American company — ukon i-ban ini sa US kun sa diin may masobra 170 million users.
Apisar pasado ini sa House paagi sa bipartisan vote, kinahanglan pa nga mag-agi ini sa Senate kag kinahanglan nga mapirmahan sang presidente agud mangin isa na ka layi.
Suno kay Wang Wenbin nga amo ang spokesperson sang Chinese ministry, wala man sang nakit-an ang US nga ebidensya nga may dala ang TikTok nga pamahog sa ila nga national security apang wala gihapon ini nagauntat.
Gin-akusaran man sini ang US nga “nagapang-bully na lang” kun indi ini makasarang sa patas nga kumpetisyon.
Nagpaandam man ang opisyal nga maga-backfire sa Amerika ang amo nga akto bangud ma-disrupt sini ang market operations, matiphag ang investor confidence kag masabotahe ang global economic order.
“This kind of bullying behaviour that cannot win in fair competition disrupts companies’ normal business activity, damages the confidence of international investors in the investment environment, and damages the normal international economic and trade order,” suno kay Wang.
Una na nga ginsiling sang US officials kag lawmakers nga nalakip sa ila ginakahangaw-an nga matabo amo nga basi kun pwersahon sang Chinese government ang tag-iya sang TikTok nga ihatag ang tanan nga ila nakolekta nga data halin sa users sa Estados Unidos sang Amerika.
Ginakahangaw-an man nga ang Chinese app ang gamiton sang Beijing agud magpalapta sang propaganda kag misinformation ukon magbilin sang malain nga impluwensya sa Americans.
Una naman nga ginklaro sang TikTok nga wala ini sang kaangtanan sa Chinese government. Ginsiling man sini nga gin-restructure nila ang kumpaniya agud mapabilin gid lamang sa US ang data nga nakuha gikan sa amo nga pungsod.#
