Nagpatrolya man ang naval kag air forces sang China malapit sa Scarborough Shoal sa West Philippine Sea kadungan sang joint exercises sang Pilipinas, United States, Australia, Japan, kag New Zealand sa sulod sang exclusive economic zone (EEZ) sang Pilipinas.
Suno sa China, ang ila People’s Liberation Army (PLA) Southern Theater Command ang nag-organisa sang routine reconnaissance, early warning, kag sea-air patrol exercises malapit sa Huangyan Island.
Nagpalabtik pa ini nga may mga pungsod nga nagadabok sang gamo sa amo nga kadagatan nga nagatuga sang tension sa rehiyon.
“The PLA Southern Theater Command on Saturday organized naval and air forces to conduct routine reconnaissance, early warning, and sea-air patrol exercises near the waters surrounding China’s Huangyan Island. Certain individual external countries are stirring up trouble in the South China Sea, creating instability in the region,” pahayag sang PLA.
Pahayag sini, nagapabilin sila nga naka-high alert para nga madepensahan ang ila national sovereign security kag maritime rights kag para nga mapabilin ang kalinong sa teritoryo.
“The theater’s troops remain on high alert, resolutely defending national sovereign security and maritime rights, and are committed to maintaining peace and stability in the South China Sea,“ dugang sa statement.
Nahibaluan nga gina-claim sang China pati ang teritoryo sa palibot sang Scarborough Shoal.
Ini nga triangular chain sang reefs kag kabatuhan ang nahamtang 240 kilometers (150 miles) west sang Luzon kag malapit 900 kilometers naman halin sa pinakamalapit nga isla sang China nga amo ang Hainan.
Sa statement naman sang Estados Unidos, ginsiling sini nga ang maritime exercises sini nga gin-conduct kaupod sa Pilipinas kag iban pa nga kaalyado ang nagapakita sang commitment nga pabakuron pa ang regional kag international cooperation sa Indo-Pacific.
Matandaan nga sa statement sang Pilipinas, wala sang specific location nga ginhatag kun sa diin sila nagpatigayon sang joint exercises.#
