Naka-record sang duha ka mga kaso sang influenza/flu-like illness ang siyudad sang Iloilo suno sa City Health Office (CHO).
Ang amo nga sakit ang may mga sintoma kaangay sang hilanat, pagpanglamig, sakit sang ulo, palanakit sang lawas, sip-on kag pagpalanakit sang tuntunlan.
Sa interview sang Bombo Radyo kay Dr. Mary Ann Diaz, head sang CHO, iya ginpahayag nga base sa morbidity week 42 ukon datos halin sa bulan sang Enero tubtob Oktubre subong nga tuig, yara na sa duha ang na-record nga mga kaso kag ini ang naka-recover na.
Suno kay Diaz, wala dapat sang kabalak-an ang publiko bangud sa subong nga binulan, gina-ekspektar na ang pagdamo sang mga trangkaso bangud sa lamig kag pag-ilis sang panahon.
Nag-abiso man ang amo nga opisina nga gilayon nga magpa check-up kung makabatyag sang mga sintoma agud malikawan ang komplikasyon, magpabakuna agud may proteksyon, mag-inom sang madamo nga tubig kag magsuksok sang facemask.
By: 𝑩𝒐𝒎𝒃𝒐 𝑯𝒂𝒏𝒏𝒂 𝑨𝒏𝒅𝒂𝒔𝒂
