Magapatigayon sang imbestigasyon ang Kamara kag Senado kaangot sa pagtukod sang kontrobersyal nga resort sa Chocolate Hills, isa ka bantog nga heritage site sa Bohol.
Suno kay House Deputy Majority Leader Erwin Tulfo, sa masunod na nga semana ang motu proprio investigation sang Kamara sa Captain’s Peak Resort.
Pahayag pa sang mamalidha, imposible nga wala sang hinalung-ong sa resort ang local government units amo man ang concerned nga mga ahensya sa gobyerno. Gani, sa hearing sa Kamara, nalakip sa natalana nga ipatawag nga ahensya amo ang Department of Environment Natural Resources (DENR) kag Land Registration Authority (LRA).
Magluwas sa House Resolution 1648 nga gin-file ni House Assistant Minority Leader Arlene Brosas para sa imbestigasyon sang Kamara, may resolution man nga gin-file si Senator Nancy Binay, chairperson sang Senate Committee on Tourism, agud nga busision man sang Senado ang construction sang resort.
Sa bahin ni Interior Secretary Benhur Abalos, ginsiling sini nga i-check sang iya ahensya kun accountable man ang concerned local government units sa amo nga isyu.
Una na nga ginpahayag sang DENR nga naka-isyu na ini sang temporary closure order sang Septyembre 2023 amo man sang violation notice sang Enero 2024. Suno sa ahensya, nag-operate ang resort apisar nga wala sila sang ginauyatan nga environmental clearance certificate.
Sa bahin sang Sagbayan, Bohol, ila ginsiling nga wala pa sang may nabaton nga temporary closure order halin sa DENR.
Kun basehan naman ang pahayag ni Julieta Sablas, administrator sang Captain’s Peak Resort, nahatagan sila sang business permit halin sa Office of the Mayor sang Sagbayan apisar nga wala sang accreditation.
Matandaan nga sang Mierkules sang gab-i, sa kasagsagan sang pagpakamalaot nga nabaton sang resort, nag-anunsyo ini sang temporary closure.
Nabutang sa sentro sang kaugot ang amo nga resort bangud ginalantaw nga daku kag malain ang epekto sini sa Chocolate Hills.
Ang Chocolate Hills kag nagapalibot diri nga areas ang gin-designar nga National Geological Monument and Protected Landscape paagi sa Proclamation 1037 sang Hulyo 1, 1997.
Dugang diri, ang United Nations Educational, Scientific and Cultural Organization (UNESCO) ang nagakilala man sa Chocolate Hills Natural Monument bilang kabahin sang prestihiyoso nga World Heritage List.#
