ILOILO CITY – Naglab-ot sa 45 ka mga kabarangayan sa syudad ang FAILURE sa inisyal nga evaluation nga ginpatigayon sang Department of the Interior and Local Goverment (DILG) may kaangtanan sa road clearing operations.
Sa rekord sang nasambit nga pamunuan, sa 138 ka mga barangay nga natapos na sa pag-validate, nag-gwa man nga 52 ang may low-compliance; 33 ang may medium-compliance; kag walo lamang ang may high-compliance.
Natalana nga libuton sang evaluation team ang nabilin pa nga 42 ka mga barangay.
Sa interview sang Bombo Radyo kay Roy Defiño, Iloilo City DILG director, iya ginpahayag nga kalabanan sa mga nakit-an nga obstruction sa amo nga mga kabarangayan amo ang illegal parking, mga bahin sang tiangge nga nagalapaw sa dalan, kag ang mga bahin sang balay nga nagasaklam sa sidewalk.
Suno pa kay Defiño, liwat sila nga magapatigayon sang evaluation sa bulan sang Mayo kun matapos na ang 75-day period nga ginamndu ni DILG Secretary Eduardo Año.
Nagpaandam man si Defiño sa mga barangay nga wala sa gihapon sang pag-uswag sa ila compliance sa road clearing operations ukon Oplan Hawan.
Suno kay Defiño, sa tion nga manubo sa gihapon ang rating nga makuha sang isa ka barangay, maga-isyu si Iloilo City Mayor Jerry Treñas sang showcause order sa punong barangay agud mapaathag sang mga opisyal ang kabangdanan kun ngaa wala nakuha ang mga obstruction.
Sa tion nga indi bastante ang rason sang barangay, mahimo nga mapasakaan sang kaso-adminitratibo ang local chief excutive ukon Punong Barangay.
Ginpakigbahin man ni Defiño nga sang nagpadulong si DILG Undersecretary Martin Diño sa syudad sang Iloilo sang Enero, nagpahayag ini nga mahimo man niya pangayuon ang lista sang mga punong barangay kag siya mismo anga mapasaka sang kaso sa Ombudsman.
