ILOILO – Mahingyo si Iloilo Gov. Arthur Defensor Jr. kay National Task Force Covid-19 chief implementer Secretary Carlito Galvez Jr. nga ipagamit ang mga public school agud mangin quarantine facility.
Sa exclusive interview sang Bombo Radyo Iloilo kay Iloilo Gov. Arthur Defensor Jr., iya ginpahayag nga magapadala siya sang sulat kay Galvez agud hingyuon nga pasugtan sila nga i-convert bilang quarantine facility ang mga eskwelahan sa tion nga kulangon ang mga hulot nga tiniran sang mga pumuluyo nga magapauli sa ila tagsa ka mga banwa.
Suno kay Defensor, ginatipon na sini ang pahayag sang mga alkalde sa nagakalain-lain nga banwa sa Probinsya sang Iloilo agud mahibaluan ang ila bahin tuhoy sa nasambit nga tikang.
Ginpahayag sang gobernador nga ideal nga quarantine facility ang mga eskwelahan bangud may kaugalingon ang mga ini nga classrooms kag comfort rooms.
