Ginklaro sang Department of Environment and Natural Resources (DENR) nga naka-isyu na ini sang closure order kag notice of violation sa administrator sang isa ka kontrobersyal nga resort sa vicinity sang Chocolate Hills sa Sagbayan, Bohol bangud sa pag-operate nga wala sang environmental compliance certificate.
Ginpaguwa sang ahensya ini nga official statement, Marso 13, matapos nasapakan sang publiko kag ginplastar ang malain nga impact sang operasyon sang Captain’s Peak Garden and Resorts sa Chocolate Hills.
Suno sa ahensya, ang temporary closure order ang nadagdag na sa project proponent sang amo nga resort sang Septyembre 2023, samtang ginpaguwa naman ang notice of violation sang Enero 2024. Sang Marso 13, 2024, nagpaguwa man ang Regional Executive Director sang memorandum nga nagamandu sa Bohol Provincial Environment and Natural Resources Officer nga magtukod sang team agud mag-conduct sang inspection sa resort kag sa compliance sini sa temporary closure order.
Sa pihak nga bahin, sa official statement naman ni Bohol Governor Aris Aumentado, ginpahayag sini nga na-address na nila ang isyu sa kontrobersyal nga resort development sa Chocolate Hills area sang September 2023. Ipasaka man suno sa iya ang ila nga problema sa tiglikom sang DENR para sa maathag nga guidance kag direksyon.
Sa official statement naman sang Department of Tourism (DOT), ginsiling nga indi accredited tourism establishment ang resort development sa Chocolate Hills sa idalom sang ila nga accreditation system kag wala man sang pending application para sa accreditation sa amo nga proyekto.
Ang Chocolate Hills ang na-deklarar nga national geological monument sa pungsod sang Hunyo 18, 1988.
Sang Hulyo 1, 1997 gindeklarar man ini nga protected area sa idalom sang Proclamation No. 1037 nga ginpaguwa ni anay president Fidel Ramos. Sa idalom sini nga proklamasyon, nakasaad nga wala dapat sang aktibidad nga maka-“alter, mutilate, deface or destroy” sa hills “regardless the existence of prior private rights.”
