Gin-ako ni Coach Freddie Roach nga indi niya luyag nga masaksihan ang adlaw nga maga-retiro na si Pinoy Ring Icon Manny Pacquiao apang ‘posible’ suno sa iya nga ang Pacquiao versus Ugas nga hampang kahapon, Agusto 22, amo na ang katapusan nga sambuwa sang Pambansang Kamao sang Pilipinas.
Suno kay Roach, nakit-an niya nga indi na maayo ang performance sang 42 anyos nga boksidor — kaangay man mismo sang pag-ako ni Pacquiao nga naga-cramp ang iya nga tiil rason nga indi siya makahulag sang husto sa sulod sang boxing ring.
“I hate to see the day he retires but this could be it. He didn’t have a great performance tonight. We’ll see what Manny decides,” pahayag ni Roach.
Masobra 20 ka tuig man ang pag-updanay nanday Roach kag Pacquiao. Indi lang trainer kag boxer ang paglantaw sa ila kundi amay kag anak.
May standing agreement sa tunga nanday Roach kag Pacquiao nga kun makit-an sang trainer nga indi na ‘at the heighest level’ ang paghampang sang eight-division world champion, siya mismo ang una nga magahambal sini sa iya.
Kahapon, kasunod sang kapaslawan ni Pacquiao nga mabawi ang World Boxing Association super welterweight belt kay Cuban boxer Yordenis Ugas, nagpahayag si Roach nga nagapakita na gid man ang edad ni Pacquiao.
Suno kay Roach, indi na malab-ot sang Pinoy ring icon si Ugas kag wala man nahatagan sang solusyon ang height and reach advantage sang amo nga defending champion.
Sa pihak sini ginpahayag sa gihapon sang trainer nga hulaton lang kun ano ang desisyon ni Pacquiao, ang nagaisahanon nga eight-division world champion sa kalibutan.
