Hugot nga ginbaton sang coach sang Team Mandurriao ang nangin sanction sa iya matapos ang tensyon nga natabo sa hampang batok sa Iloilo City Proper sa Dinagyang Cup 2026.
Sa interview sang Bombo Radyo kay Coach Jay Dan Delos Santos, iya ginpahayag nga gin-suspend siya kag indi mahimo maka-coach sa iya team kun mag-resume na ang Game 2.
Pahayag sini, nabaton na sini kun ano man ang desisyon, madamo siya sang natun-an, kag tion na agud nga maka-move on sa amo nga hitabo.
Kun balikan, temporaryo nga ginpauntat ang hampang kagab-i bangud sa natabo nga tensyon nga nag-ugat sa desisyon sang referee nga i-technical foul si Delos Santos.
Una naman nga napakig-angutan sang Bombo Radyo si Mr. Rudiver Jungco, Sr., Executive Assistant for Youth and Sports sang Iloilo City Government nga yara man mismo nagalantaw sa amo nga match. Iya ginpahayag nga sa pamuno pa lang sang hampang, nagareklamo na ang coach sang Mandurriao sa kada tion nga indi ini kumbinsido sa kada call sang game official.
Pila ka beses ini natabo nga ginlaragway ni Jungco nga indi maayo nga gesture.
Suno kay Jungco, sang gin-technical foul na ang coach sang Mandurriao, didto kag naghana ini nga mag-walkout apang wala man dalayon naka-walkout bangud yara man gihapon ini sa sulod sang court.
Pahayag pa sini, gindesisyunan na lang nga indi pagpadayunon ang hampang ilabi na bangud tensyonado sa gihapon ang venue kag madamo pa ang nagalantaw.
Suno naman kay Delos Santos, may may mga “inconsistent” nga mga tawag sang mga game official, apang pila ka beses nila ini nga ginpabayaan lang kag ginpadayon ang game.
Pahayag pa sini, sang nakabunggo na ang ulo sang iya player kag wala gid sang call nga ginhimo ang referee, didto na kag nag-alsa siya bangud sa iya pag-ulikid sa safety sang iya player.
Sa statement sang ila team, nakibot sila suno sa ila sang gindeklarar nga “thrown out” na si Coach Delos Santos bisan nga wala pa sang technical ukon formal warning.
Kun may nahambal man nga indi maayo suno sa team, ginapangayuan nila ini sang pasensya bangud halin man ini sa responsilidad kag pag-ulikid bilang coach nga luyag nga proteksyunan ang iya player sa court.
Sa interview subong nga gab-i, ginsulit ni Delos Santos ang iya pagpangayo sang pasensya sa alkalde, kay Jungco, sa league organizers, kag referees sa kun ano man ang iya nangin gesture nga indi maayo.
“At the end of the day, baton ko man nga out na ko sa playing court kay bal-an ko man nga may kapaltahan ko ah,” pahayag sini. “Damo ta na-learn sa amo ni nga butang. Indi lang ako ang may natun-an kundi for sure ang mga naga-officiate man. Learning experience ni sa aton tanan. Sa liwat, gapangayo ako sang pasensya. Salamat, kag mag-move on na ta,” dugang sini.
Ginklaro man sini nga wala sang pustaanay nga involved sa ila pag-representar sang Mandurriao — baliskad sa nagaguwa nga reports nga may nakataya nga kuwarta para sa hampang.
Natalana pa nga ipaguwa ang schedule kun san-o maga-resume ang Game 2.#
