Magapabilin sa heightened alert status ang Philippine Coast Guard Station Iloilo tubtob Abril 5.
Ini kadungan sang pag-obserbar sang Semana Santa kun sa diin madamo ang mga nagabyahe nga mga tumuluo kag mga tawo nga magpaliwa-liwa kadungan sang holidays.
Sa interview sang Bombo Radyo kay Ensign. El John Ga, spokesperson sang nasambit nga ahensya, iya ginpahayag nga nag-deploy na sila sang 200 personnel agud nga magbantay sa nagkalain-lain nga mga ports kag terminal sa siudad kag probinsya sang Iloilo.
Suno kay Ga, may ara man sila sang passenger assistance center para mag-akomodar sang mga pamangkot sang mga pasahero.
Nag-deploy man sila sang ila personnel sa mga sakayang pandagat agud mag-monitor.
Nagpahanumdom man ini sa publiko nga likawan gid ang pagdala sang mga delikado kag ginadumilian nga mga bagay ilabi na ang makahulubog nga mga ilimnon agud nga mangin tayuyon ang ila nga mga pagbyahe.
