Gin-athag sang Commission on Elections (Comelec) nga wala ini sang mahatag nga dugang nga bayad sa mga manunudlo nga nag-overtime sa pag-trabaho sa 2023 Barangay and Sangguniang Kabataan Elections (BSKE).
Suno kay Comelec Chairman George Garcia, may joint circular sa tunga sang Commission on Audit kag Department of Budget and Management nga ang mga empleyado lamang sang ahensya ang mahimo maka-claim sang overtime pay.
“In as much as we would like to give, however, there is this joint COA-DBM (Commission on Audit – Department of Budget and Management) circular which provides that only employees of an agency [are] entitled to claim overtime. The teachers who served as electoral board members are not employees of Comelec,” paathag ni Garcia.
Ang mga manunudlo nga nagserbe nga electoral board members ang indi man makabig nga empleyado sang Comelec suno sa iya gani wala sila sang budget.
Apang suno sa natungdan, lauman nga matapos na subong nga adlaw, Nobyembre 3, ang paghatag sang honoraria sa halos 500,000 ka public school teachers nga nagbulig bilang election workers.
Ang honoraria para sa poll workers sa 2023 barangay polls ang yara sa P10,000, P9,000, kag P8,000 para sa electoral board chair, EB member, kag Department of Education supervisor official (DESO). #
