ILOILO CITY- Nagpatigayon sang Committee hearing ang Committee on Transportation sa Iloilo City Council sa diin gin- istoryahan ang reklamo sang mga transport groups nga nag-ugat sa pagtukod sang transport hub sa Iloilo Business Park sa Mandurriao, Iloilo City.
Sa interview sang Bombo Radyo kay Iloilo City Councilor Rommel Duron, chairman sang nasambit nga komitiba, iya ginpahayag nga ginapanindugan sang mga transport groups nga iligal ang pag-grant sang Point to Point provisional authority sa Southwest transport bangud nagalapas ini sa naga-eksister nga mga ordinansa.
Suno kay Duron, ginplastar sang mga transport groups nga ginalapas sang provisional authority ang Perimeter Boundary Ordinance.
Gindugang man sang konsehal nga ginapakigbato sang mga transport groups nga wala nalakip ang Point to Point buses sa Regulation ordinance 2019-110, ukon ang ordinansa nga naga-grant sang Megaworld Corporation sang otoridad agud magtukod kag mag-operate sang transport hub sa Iloilo Business Park.
Magluwas diri, ginreklamo man sang mga transport groups nga wala sila ginpahibalo tuhoy sa pag-grant sang Provisional Authority sa Southwest Transport Point to Point buses kag wala man sila gin-imbitar sa public consultation hearing sa Sangguniang Panlungsod antes gin- grant ang otoridad sa Megaworld nga magtukod sang transport hub.
Samtang suno sa konsehal, kun pagtuga sang paggutok sang trapiko ang istoryahan, indi man makatuga gid sang problema sa trapiko ang Point to Point buses bangud isa man lang ka unit sini ang nagagwa kada oras.
Sa bahin naman sang indi paglakip sang Point to Point buses sa Regulation ordinance 2019-110, iya ginpahayag nga mas pakamaayuhon sini nga Point to Point buses nalang ang magbyahe sa baylo nga iban nga mga public utility vehicles.
