ILOILO CITY- Nagpasalig ang chairman sang Committee on Transportation sa Iloilo City Council nga mapangitaan sang solusyon ang problema sa pagginutok sang mga pasahero sa mga terminal sa syudad bangud sa kakulang sang units sang Public Utility Jeepneys.
Sa interview sang Bombo Radyo kay Iloilo City Councilor Sedfrey Cabaluna, iya ginpahayag nga may napakig-angutan na niya ang Public Safety and Transportation Management Office nga ginapamunuan ni Mr. Jeck Conlu para talupangdon ang concern sang mga pasahero ilabi na subong nga ginapatuman na ang full face to face classes.
Suno kay Cabaluna, dako man ang responsibilidad nga ginatungdan diri ang Land Transportation Franchising and Regulatory Board bangud nga ini ang naga-isyu sang franchise sa mga de-pampasahero nga salakyan gani yara man sa ila ang regulatory powers agud nga obligaron ang mga franchise holders nga tungdan ang ila papel sa pag-provide sang serbisyo sa mga commuters.
Dugang sang konsehal, magluwas sa kakulang sang mga units sang jeep, naistoryahan man ang pagginutok naman sang mga salakyan sa tion sang peak hours.
Suno pa sa natungdan, hulaton niya ang i-propose nga solusyon sang Public Safety and Transportation Management Office sa amo nga mga problema agud makahimo man sang nagakaigo nga tikang ang iya kumitiba.
