Ginbasura sang Office of the Ombudsman ang criminal kag administrative complaints batok kanday Executive Secretary Ralph Recto kag anay Philippine Health Insurance Corp. (PhilHealth) President kag CEO Emmanuel Ledesma Jr.
Ini ang may kaangtanan sa pagsaylo sang P60 billion nga reserve fund sang PhilHealth sa National Treasury sang 2024.
Suno kay Ombudsman Jesus Crispin Remulla, ginbasura nila ang mga reklamo nga technical malversation, graft kag plunder batok sa duha bangud sang kakulangan sang prima facie evidence ukon inisyal nga ebidensiya agud mapasakaan sila sang kaso.
Nag-ugat ang kaso sa pagsaylo sang sobra nga reserve funds sang PhilHealth nga gin-alegar sang mga nagreklamo bilang ilegal nga paggamit sang pondo sang gobyerno nga mahimo makadala sang risgo sa mga programa sang pungsod para sa pag-atipan sang ikaayong lawas.
Matandaan nga ginmandu na sang Supreme Court ang pagbalik sang pondo sang Disyembre 3, 2025.
Kun balikan, ginsaylo ang pondo suno sa Department of Finance (DOF) Circular No. 003-2024 sang tion nga si Recto amo pa ang finance secretary. Ini agud mapatuman suno sa ahensya ang isa ka espesyal nga probisyon sa 2024 General Appropriations Act (GAA) kaangot sa paggamit sang unprogrammed appropriations.
Sa 40-page consolidated resolution, ginsiling nga nakita sang Ombudsman nga ang mga tikang ni Recto ginhimo sa maayo nga intensyon ukon good faith kag “incidental” lamang sa iya ministerial nga katungdanan nga magsunod sa isa ka legislative mandate.
Ginpabutyag sang Ombudsman nga ang kriminal nga salabton para sa “technical malversation” nagakinahanglan sang pamatuod sang intensyon ukon proof of intent nga maghimo sang ginadumilian nga buluhaton — nga wala napakita sang mga nagreklamo.
Dugang pa, ginbasura man sang Ombudsman ang kaso nga “plunder,” matapos wala sang ebidensiya nga may bahin sang P60 bilyon nga ginamit para sa personal nga kinahanglanon ukon benepisyo sang respondents.
Ginpaathag sang anti-graft body nga para magmadinalag-on ang kaso nga “plunder,” kinahanglan may pamatuod sang pagtipon sang iligal nga manggad ukon ill-gotten wealth nga klaro suno sa Ombudsman nga wala sa sini nga kaso.
“Thus, the return of the PhP60 billion to PhilHealth militates against the allegation that respondents took advantage of their positions for ‘personal enrichment,’” suno sa resolusyon sang Ombudsman.
May kaangtanan naman sa administratibo nga aspeto sang kaso, ginbasura sang Ombudsman ang reklamo nga “grave misconduct” batok kay Recto bangud man sang kakulangan sang nagakaigu nga ebidensiya.
Ang administratibo nga reklamo batok kay Ledesma ginbasura man bangud sang kakulangan sang hurisdiksyon bangud nakabiya na siya sa serbisyo publiko sang ginpasaka ang mga reklamo sang Marso 2026.#
