Nag-ayo na ang kumpirmado nga kaso sang mpox sa probinsya sang Iloilo halin pa sang Mayo 23, suno sa Iloilo Provincial Health Office (IPHO).
Ginkumpirmar ini sang IPHO matapos ang 21 ka adlaw nga isolation kag wala na sang mga lesions.
Lima ka close contacts sang pasyente ang wala nagpakita sang sintomas sang mpox kag yara subong sa home quarantine.
Sa interview sang Bombo Radyo kay IPHO Head Dr. Maria Colmenares-Quiñon, Head sang Provincial Health Office, iya ginpahayag nga ginkumpirmar sang Research Institute for Tropical Medicine (RITM) ang positibo nga kaso matapos mapasa ang tatlo ka specimen para sa testing.
Duha sa mga sample ang nagnegatibo, samtang isa ang kumpirmado nga positibo.
Ang pasyente, nga wala sang travel history, subong yara sa home isolation kag padayon nga nagapahuway.
Suno kay Quiñon, siyam ka close contacts sang pasyente ang nakilala na kag ginbutang man sa isolation, kag wala pa sang ginapakita nga sintomas tubtob subong.
Antes sini, una nga ginpahayag man sang Iloilo City Health Office nga may isa man nga kumpirmado nga kaso sang mpox kag apat ka suspected cases nga ginabantayan subong.
Nagpanawagan naman si Dr. Quiñon sa publiko nga magpabilin nga kalmado apang magpabilin nga alerto, kag sundon gid ang tanan nga public health advisories.
