ILOILO CITY – Nagsugod na ang pagpatigayon sang contact tracing sa mga naka-upod sang personnel sang Iloilo City Emergency Responders nga nagpositibo sa Coronavirus Disease 2019.
Sa interview sang Bombo Radyo, kay Dr. Roland Fortuna, focal person for COVID-19 sa Iloilo City iya ginpahayag nga naka designar lang sa office ang nasambit nga personnel kag wala naga upod sa ambulansya kada may gina respondehan nga emerhensya.
Suno kay Fortuna, natukiban man nga asymptomatic ang nasambit nga pasyente kag sa subong naka home quarantine na.
Dugang sang natungdan, ginpaidalom na sa quarantine ang iya mga kaupod sa opisina samtang ginahulat ang resulta sang ila nga test.
Ginpasarado naman ang compound sang Motorpool para sa disinfection.
Nahibaluan nga temporaryo nga ginatugyan sa Bureau of Fire Protection-Iloilo City ang trabaho sang Iloilo City Emergency Responders.
Nagpasalig naman ang Iloilo City Government nga bastante ang mangin suplay sang pagkaon kag iban pa nga mga kinahanglanon sa mga naka quarantine nga personnel sang ICER.
Sa tion nga maggwa na ang resulta sang test sang mga personnel, kag madamo ang magnegatibo amat-amat na nila nga ibalik ang operasyon sang Iloilo City Emergency Responders.
Nagpasalig naman ang City Disaster Risk Reduction and Management Office nga handa sila nga buligan ang mga personnel kag staffs sang Iloilo City Emergency Responders nga nakapaidalom subong sa quarantine.
Sa interview sang Bombo Radyo kay Donna Magno, pinuno sang City Disaster Risk Reduction and Management Office iya ginpahayag nga padayon ang ila pagpakig-angot sa mga personnel bangud pat-ud nila nga kinahanglanon nila ang bulig sang City government ilabi pa subong nga ginahulat pa nila ang resulta sang ila test.
