ILOILO CITY – Ginakabig ni Iloilo City Councilor Plaridel Nava nga “lonely battle” ang tikang agud manabat ang kontraktor nga International Builders Corporation kag mga opisyales sang Department of Public Works and Highways nga naangot sa pagpatukod sang kontrobersyal nga P680-Million Ungka Flyover.
Sa interview sang Bombo Radyo kay Councilor Nava, daw kaangay nga siya lang ang naga-isahanon sa konseho nga nagaduso nga mag-imbestigar sa kontrobersyal nga proyekto.
Sa subong, nagapreparar na siya sa pagpasaka sang kaso batok sa mga indibidwal nga responsable sa palpak nga proyekto.
Sa matuod suno kay Nava, nagapatigayon na ini sang data gathering kun sa diin ginatipon na ang kontrata, voucher, payment, kag resulta sang third party consultant sang depektibo nga flyover.
Ginpahayag dugang sang natungdan nga nagpabutyag naman sang suporta ang pila ka mga opisyales sang simbahan, university presidents, mga negosyante, kag government officials sa pagpasaka sang kaso.
Nahibaluan nga nakahanda man si Pavia Sangguniang Bayan Member Jose Maria “Pyt” Trimañez nga updan si Nava sa tion nga magpasaka ini sang kaso.
