Gin-athag sang Department of the Interior and Local Government (DILG) nga ang mga indibidwal nga luyag magpabakuna batok sa COVID-19 ang ipahibalo lang sang brand sa mismo vaccination site.
Suno kay DILG Secretary Eduardo Año, indi na pagpahanugutan ang mga local government units (LGUs) nga magpagwa sang ‘advance announcements’ sa brand sang bakuna nga gamiton.
Ang pahayag sang tiglikom ang kasunod sang rekomendasyon sang Department of Health.
Ginpasigurado man ni Año nga ang tanan nga mga bakuna ang nag-agi sa maidid nga proseso sa diin makabig ini nga safe kag epektibo.
“The best vaccine is the one that is available; therefore in order to overcome brand preference, LGUs should not announce the brand of vaccine to be used in vaccination centers,” pahayag ni Año.
Natalana naman nga magpagwa ang DILG sang memorandum sa tanan nga mga LGU.
“The person will be informed of the brand in the vaccination center and he will have to give his informed consent but if he refuses, he will have to go back to the back of the line.”
Gin-athag man ni Año, nga ang ‘right to information’ sang kada indibidwal ang respetuhon.
Suno sa tiglikom, ang nasambit nga tikang ang may katuyuan nga mapunggan ang mass gathering sa tion nga ianunsyo ang brand sang bakuna.
“We need to educate the people in order to overcome brand preference. All FDA-approved vaccines are just Emergency Use Authorization. They are all similarly situated,” dugang pa ni Año.
“Our health experts have repeatedly said that there is none that is more effective than the other. All of them prevent hospitalization or critical illness from Covid. That is what is important.”
Samtang, suno naman kay Health Undersecretary Myrna Cabotaje, ang nasambit nga stratehiya ang ginalauman nga mapunggan nga masulit ang malawig nga pila sa Pfizer vaccines sa Parañaque City kag Manila sang damlag lang.
Ginalauman man nga makabulig ang nasambit nga tikang agud mapadasig ang vaccine rollout.
