Ginpasalig sang Department of Agriculture (DA) nga wala sang dapat kabalak-an nga magatimbuok ang presyo sang bugas sa Western Visayas.
Suno kay Mr. Dennis Arpia, regional director sang DA Region 6, nagapadayon subong ang pag-ani sang humay kag sa pagkamatuod, ginapanan-aw sang ahensya nga mas bugana ang patubas subong nga tuig ipaanggid sa 2022.
Pahayag pa sang regional director, nabawi na ang price ceiling sa bugas nga ginpatuman sang Septyembre apang madamo pa sang pilian ang mga konsumidor kun sa diin makabakal sang barato nga bugas sa mga merkado.
Kun sige-sige ang harvest suno kay Arpia, manubo ang posibilidad nga may saka-presyo.
Kun balikan, sandig sa ginpaguwa nga data sang Philippines Statistics Authority (PSA), nakit-an nga may pagnubo sa produksyon sang humay sa rehiyon sa second quarter sang 2023.
Yara lamang ang produksyon sa 129,475.94 metric tons nga 3.82 percent ukon 5,142.82 metric tons nga mas manubo ipaanggid sa produksyon sa amo man nga quarter sang nagligad nga tuig.
Kun basehan naman ang report sang National Irrigation Administration (NIA), ginapanan-aw man nga may kapierdehan sa rice production sa masunod nga tuig bangud sa mangin epekto sang El Niño sa sistema sang irigasyon sa pungsod.
Suno sa ahensya, lakip ang Western Visayas (15,000 ektarya) sa mga vulnerable sa El Niño. #
