Napaslawan sa gihapon ang defense team nga depensahan ang bise presidente sa mga ebidensya kag testimoniya nga ginpresentar sa impeachment trial suno sa prosecution team.

Sa ika-44 nga adlaw sang trial kahapon, ginsiling ni House prosecution panel adviser Ace Barbers nga indi bastante ang testimonya ni Atty. Rainer Dela Fuente, founder sang AML Consulting PH, agud balion ang mga ebidensya sang prosecution.

Nagpahayag man sang pagpang-duha-duha ang pila ka senator-judges sa abilidad sang testigo sa pagsabat sang mga pamangkot kag sa pagdepensa nga indi matuod ang una nga report nahanungod sa ginapahayag P817 milyon nga manggad ni Duterte.

Ginkatingala naman ni House Prosecutor Chel Diokno nga wala napreparahan kag wala man lang ginbasa ni Dela Fuente ang mga financial records nga may kaangtanan sa kaso antes siya naghatag sang iya opinyon.

Ginpunto ni Diokno nga importante nga nahibaluan kag nabusisi anay sang isa ka testigo ang mga dokumento antes ini maghatag sang iya konklusyon.

Samtang, suno naman kay House Prosecutor Joel Chua, nagapadayon sa gihapon ang ila paghulat sang prosekusyon kag sang publiko sa mga testigo sang depensa nga makabato sang mga alegasyon nga ginahaboy batok kay Duterte.

Lakip sa ginahulat nga mapamatud-an sang depensa amo ang mga alegasyon nahanungod sa undeclared Statement of Assets, Liabilities and Net Worth (SALN) sang Bise Presidente.