DepEd- 6, gin-extend ang enrollment tubtob sa Hulyo 15 bangud sa manubo nga turn-out; pila ka eskwelahan, magasirado subong nga tuig

ILOILO CITY- Ginpalawig pa sang Department of Education- Region 6 ang enrollment para sa blended learning methods sa tunga sang Coronavirus disease 2019 (COVID-19) pandemic.

Sa interview sang Bombo Radyo kay Dr. Lea Belleza, DepEd Region 6 Regional Information Officer, iya ginpahayag nga manubo ang enrollment turn-out sa gintalana nga deadline kahapon, Hunyo 30.

Suno kay Belleza, sa duha ka milyon nga target enrollees sa Western Visayas subong nga tuig, kapin sa 60 percent pa lang ang nakapa-enroll nga yara lang sa masolosobra isa ka milyon.

Nagalaum naman si Belleza nga pinaagi sa extension sang enrollment, malagas sang Department of Education ang target.

Gin-ako naman ni Belleza nga ang manubo nga enrollment turn-out ang epekto sang remote enrollment paagi sa pagpasa sang Learner Enrollment Survey Forms sa drop boxes bangud ginadumilian ang face-to-face enrollment.

Gintuad naman sang natungdan nga may mga eskwelahan nga nag-signify nga magauntat anay sang operasyon subong nga tuig bangud man sa epekto sang pandemya.