Nalabawan sang Department of Education ang iban nga mga ahensya sang gobyerno sa trust and performance rating sa third quarter sang 2023.
Suno sa OCTA Research Tugon ng Masa survey, nakuha sang DepEd ang 79% nga trust rating kag 80% nga performance ranking sa pangkabug-usan.
Kalabanan sa adult Filipinos nga nagasalig sa ahensya ang nagikan sa Visayas kag Mindanao nga pareho nga naghatag sa education department sang 88% rating, samtang mas manubo naman sa Balanced Luzon nga yara lamang sa 70%.
Nagasunod sa DepEd ang Commission on Higher Education (CHED) kag ang Department of Public Works and Highways (DPWH) nga may 75%, ang Department of Health (DOH) nga may 74%, kag ang Department of Social Welfare and Development (DSWD) nga panglima nga may 73%.
Ini nga top five trusted agencies amo man ang lima ka top-performing agencies.
Sa amo man nga survey, nabaton sang Department of Trade and Industry (DTI) kag Department of Budget and Management (DBM) ang pinakamanubo nga trust ratings nga yara lamang sa 16% kag 12%.
Ginpatigayon ang survey paagi sa face-to-face interviews sa masobra 1,200 ka adult Filipinos edad 18-anyos pasaka halin sang September 30 tubtub sang October 4. May yara ini sang margin of error nga ±3% nationwide kag 6% sa major regions.
