Ginplastar sang isa ka legal expert ang duha ka mga posibilidad nga matabo nga mahimo magpa-delay sang impeachment trial batok kay VP Sara Duterte.
Sa interview sang Bombo Radyo kay Atty. Nestor Jeremy Moreno, Law Professor sa College of Law sa University of San Agustin, iya ginpahayag nga isa ka posibilidad diri amo ang may kaangtanan sa pending petition sang kampo ni VP Sara sa Supreme Court.
Ang amo nga petisyon ang may kaangtanan sa pag-challenge sa validity kag constitutionality sang fourth impeachment complaint batok sa iya.
Suno kay Moreno, bangud wala pa sang desisyon ang Korte Suprema kaangot sa petisyon, may posibilidad nga magpagwa ini sang desisyon sa tunga-tunga sang impeachment trial kag kun magpabor kay VP Sara ang desisyon, maapektuhan gid ang dalagan sang trial.
Ang isa naman ka posibilidad suno kay Moreno ang nakasandig mismo sa mga senator-judges.
Paathag niya, posible nga may senador nga magduso nga i-hold anay ang proceedings kag kun aprubahan ini sang mayorya, ma-delay gid ang trial batok kay Duterte.
