ILOILO – Depresyon ang ginalan-aw nga rason sa pag-utas sang kabuhi sang 21 anyos nga Architecture Student sa isa ka pribado nga unibersidad sa syudad sang Iloilo.
Sa interview sang Bombo Radyo kay Alyas Rebecca, kaupod sang biktima sa boarding house, iya ginpahayag nga madugay na nga may depresyon ang biktima tuga sang madamo nga problema kaangay sang insecurities sa iya kaugalingon.
Suno kay Rebecca, isa ka maayo kag maalam nga estudyante ang iya pagkakilala sa biktima, rason nga wala gid siya nagdumdum nga maghikog ang 21 anyos nga Architecture student paagi sa pagbitay sang iya kaugalingon gamit ang nylon cord.
Nahibaluan nga ini na ang ika lima nga bes nga nagtuyo sa paghikog ang biktima kun sa diin una, ginlaslas niya ang iya palad, nag-inom sang 20 ka bilog nga tablet ukon bulong, paggamit sang paha, nag-inom sang muriatic acid kag ang pinaka-ulihi amo ang paghikog gamit ang nylon cord.
Tuman nga nagakasubo ang pamilya sang biktima bangud madamo pa kun tani sila sang handom para sa valedictorian kag multi awarded nga estudyante.
Nagahingyo naman si Rebecca sa mga ginikanan nga bantayan ang ila kabataan bangud isa ka seryoso nga problema ang depresyon.
