Patay ang deputy chief tanod sa Barangay Cubay, Jaro, matapos matiruhan sa kinagamo kaagahon subong sang Nobyembre 19, 2026.
Ginkilala ang biktima nga si Gilbert Robles, 44 anyos, ukon kilala nga si alyas “Gamay.”
Sa interview sang Bombo Radyo kay Edelen Abon, partner sang biktima, iya ginpahayag nga nagresponde ang biktima sa natabo nga kinagamo sa isa ka birthday party.
Apang, samtang yara sa lugar, natiruhan ini sang suspek nga indi tumandok sa lugar kag taga-Cebu.
Tatlo ka lupok ang nabatian antes nakita nga duguon ang biktima nga may igo sa wala nga bahin sang iya nga lawas.
Gilayon naman nga gindala sa ospital ang biktima apang ginbawion gid ini sang kabuhi.
Nahibaluan nga pito na ka tuig nga nagaalagad bilang tanod si Robles sa nasambit nga barangay.
Nagapanawagan naman sang hustisya ang partner sang biktima.











