Di maagwantahan nga baho sang hangin nga daw kanal ukon patay nga sapat, upod pa ang nagatumpok nga basura kag wala pa natapos nga plaza; ini ang ginareklamo sang mga pumuluyo nga nagaagi, nagabisita, kag nagausar sang Mandurriao Plaza.
Sa interview sang Bombo Radyo kay Albert Labrador, isa ka residente kag regular nga nagahampang sa basketball court sa plaza, ginpahayag niya nga sila sang iya mga kaupdanan, indi na makabatas sa baho nga nagadapya sa hangin. Suno sa iya, masami nila mapanimahuan ang mabaho nga hangin samtang nagahampang, kag tungod sini ginadulaan sila sang gana nga magpaliwa-liwa sa plaza.
Gindugang pa ni Labrador nga madamo man sang mga tawo nga nagasimba, mga estudyante, kag mga nagapadulong sa merkado publiko ang nagalikaw sa lugar bangud sang baho nga nagagikan sa basura.
Nagpagwa naman sang pahayag ang opisyal sang barangay may kaangtanan sa isyu sang baho sa Mandurriao Plaza.
Sa interview sang Bombo Radyo kay Kagawad Ricardo Juanillo Jr. sang Barangay Oñate de Leon, Mandurriao, ginpahayag niya nga ang basura nga nagatumpok sa plaza naghalin sa relocation sang Mandurriao public market kag bangud sang konstruksyon sang bag-o nga merkado.
Dugang pa ni Juanillo nga ginakuha man sang J.S. Layson ang basura sa pick-up point kag may ginapatigayon nga pagpaninlo sa lugar. Apang ginsambit man niya nga may mga basura nga posible ginahaboy sang mga pumuluyo sa likod sang cage sang drop-point area.
Ginpahayag pa ni Juanillo nga may clean-up operation nga pagahiwaton sa luagr, apang wala pa sang klaro nga desisyon kun sa diin isaylo ang drop-point sang basura nga subong nahamtang mismo sa Mandurriao public plaza.
(Reported by Bombo Lyka Sandiego via Bombohanay Bigtime)
