Nagapati ang Department of Information Communications Technology nga dapat nakahibalo ang mga ginikanan sa paggamit sang social media platforms.
Ini agud mas mahibaluan man sang mga ini kag mas mabantayan ang ila kabataan sa social media.
Kasunod ini sang nagataas nga suicide rates sang mga kabataan sa Iloilo kag sa bug-os nga pungsod.
Sa interview sang Bombo Radyo kay Atty. Leandro Angelo Aguirre, Undersecretary sang DICT, iya ginpahayag nga indi man mahimo nga dumilian ang mga kabataan sa paggamit sang online platforms ilabi na subong nga madamo na ang mga ini sang matun-an online.
Ginpakigbahin man niya nga mas maayo kun may ara ang gobyerno sang mga polisa nga magapasangkad sa pagprotekta sang mga kabataan.
Nagpahayag man si Aguirre nga importante man nga nakahibalo ang mga ginikanan sa ginapangatubang nga problema sang ila kabataan paagi sa pagpamati.
Dugang pa niya, kinahanglan man nga likawan sang mga ginikanan ang pagkumparar sang ila tion sa henerasyon sang mga pamatan-un.
