Ginkumpirmar sang Department of the Interior and Local Government nga nahibaluan nila kun sa diin si Vice President Sara Duterte sang nagpagwa sang arrest warrant ang Quezon City Regional Trial Court sa kaso nga Grave threats sang nagligad nga Byernes.
Apang suno kay DILG Sec. Jonvic Remulla, wala nila gin-aresto ang bise presidente bangud indi nila luyag nga i-force arrest ini.
May kaangtanan ang nasambit nga kaso sa ginapahayag plano nga assassination ni Duterte sang 2024 kanday President Ferdinand Marcos Jr., First Lady Liza Marcos, kag Former House speaker Martin Romualdez.
Sa pagpadulong sang bise presidente kahapon nga adlaw sa nasambit nga korte agud magpyansa, direkta sini nga ginpahayag nga wala siya sang salig sa korte, kapulisan, kag bisan pa sa iya kaugalingon nga security personnel.
Suno kay Remulla, naapektuhan gid ang panan-awan sang bise presidente bangud sa mga pressure nga ginapangatubang sini.
Dugang man niya, ginhatagan gid sang PNP si Duterte sang nagakaigo nga respeto sang ini ang nagpadulong sa korte.
