Magapasundayag na subong nga adlaw, Enero 27, ang Kasadyahan sa Kabanwahanan nga isa ka major event sa Dinagyang Festival 2024.
Magasugod ang festival showcase kag kumpetisyon karon sa hapon kag magatapos antes ang pagsugod man sang grand religious sadsad karon sa gab-i sa Plaza Libertad.
Ini ang labing-una nga tion nga iga-host ini sang Iloilo Provincial Government kag subong nga tuig, gin-rebrand man ini bilang Kasadyahan sa Kabanwahanan Festival halin sa nakaandan anay nga Kasadyahan Festival.
Sa interview sang Bombo Radyo kay Iloilo Governor Arthur Defensor, Jr., iya ginpahayag nga ang aktibidad nga ini ang pahanumdom sa ginhalinan sang mga pumuluyo sa Iloilo ilabi na bangud nagapangugat man ang Dinagyang sa maragtas kag sa relihiyon sa Panay.
Pamaagi man ini suno sa iya agud mapakilala kun sin-o ang mga Ilonggo kag ano ang probinsya sang Iloilo — ilabi na ang pagtib-ong sang Fun, Foodie, Friendly Iloilo nga tagline sang probinsya.
Ang balantayan sa Kasadyahan sa Kabanwahanan amo ang:
* Kaing Festival sang Leon kun sa diin ipakilala pa dugang sa publiko ang kaing nga amo ang simbolo sang bugana nga ani sa banwa sang Leon;
- Kasag Festival sang Banate kun sa diin iga-selebrar ang kontribusyon sang kasag sa palangabuhian sang mga taga-Banate
- Saad Festival sang Leganes nga isa ka cultural dance-drama presentation bilang paghatag dungog kay St. Vincent Ferrer, ang patron saint sang Leganes.
- Katagman Festival sang Oton nga selebrasyon sang maragtas kag kultura sang dumaan nga trading port sa Panay nga Katagman nga amo anay ang pangalan sang Oton;
- Tultugan Festival sang Maasin nga isa ka tribute sa tultugan ukon ang native bamboo percussion nga ginagamit nga pamaagi sa komunikasyon kag paghimo sang musika sa Maasin, ang bamboo capital sang Iloilo;
- Banaag Festival sang Anilao nga pat-od nga mangin showdown sang nagabanaag kag tuman ka dalayawon nga mga suga
- Cry of Jelicuon Festival sang New Lucena nga amo ang re-enactment sang maragtason nga Cry of Jelicuon nga amo ang pagpakigbato sang mga Ilonggo para sa kahilwayan sang tion sang mga Espanyol.
- Hirinugyaw Suguidanonay sang Calinog nga isa ka cultural festival kun sa diin makit-an kun paano magsugid sang istorya paagi sa chanting.
- kag Pantat Festival sang Zarraga nga paagi sa pagkilala sa catfish ukon pantat nga amo ang pinakabantog nga produkto sang Zarraga.
(Photo: Iloilo Dinagyang Festival)
