Ginatindugan sang Department of Transportation (DOTr) ang desisyon sini nga indi pag-i-extend ang Disyembre 31, 2023 nga deadline para sa consolidation sang operators agud maka-comply sa Public Utility Vehicle Modernization Program (PUVMP).
Nakabutang ini sa statement nga ginbalhag sang ahensya matapos nagguwa ang mandu sang Korte Suprema sa amo nga department kag sa Land Transportation Franchising and Regulatory Board (LTFRB) nga magkomento sa petisyon nga gin-file batok sa ila sang public utility jeepney operators kag transport groups.
Suno naman sang DOTr, ang modernization program ang nakabaton na sang suporta sang 70% nga mga operators sang public utility vehicles (PUVs).
“The PUV consolidation deadline stays. This initiative has gained the support of majority of our PUV operators as around 70 percent of them have already taken part in the consolidation process,” kabahin sang statement nga ginpaguwa sang DOTr nga ginapamunuan ni Secretary Jaime Bautista.
May dugang man ini nga pasalig sa commuters: “Rest assured that your government is committed to making this program work as this aligns with goal of the Marcos administration on easing the plight of commuters by ensuring cleaner and safer means of public transportation for the riding public.”
Antes sini, nagpaguwa ang LTFRB sang bag-o nga guidelines kun sa diin nakasaad nga pahanugutan ang unconsolidated public utility vehicles nga magpadayon sang operasyon tubtub sa Enero 31, 2024 — ukon may isa ka bulan nga grace period pagkatapos sang Disyembre 31 nga consolidation deadline.
Mahimo ini maka-operate sa areas nga may manubo sa 60% nga consolidated authorized units. Apang ginklaro man sang regulatory board nga maga-isyu ini sang show-cause orders sa mga wala naka-consolidate. Gin-athag man sini nga tanan nga units nga wala naka-apply para sa consolidation antes ang deadline ang indi mahimo ma-kumpirma sa registration bilang PUVs.
