ILOILO CITY- Ginaapelar sang National Association of Municipal Health Officers of the Philippines sa Department of Health nga indi pagdayunon ang deployment sa Cebu sang mga Doctors to the Barrio(DTTO) gikan sa Western Visayas.
Sa interview sang Bombo Radyo kay Dr. Clemencia “Mimi” Bondoc, Presidente sang National Association of Municipal Health Officers of the Philippines (AMHOP National) kag Municipal Health Officer sang banwa sang Zarraga, iya ginpahayag nga ginapamatukan nila ang nasambit nga tikang sang Department of Health bangud mas kinahanglan sang Western Visayas ang serbisyo sang mga DTTO.
PRESIDENT, AMHOP NATIONAL
Suno kay Dr. Bondoc, kaangay sa Cebu, nagasaka man ang kaso sang Coronavirus disease 2019 sa Western Visayas kag kun basehan ang statistics, dako ang pagkinahanglan sang Western Visayas sa mga doktor nga ipadala sa Cebu.
Pahayag pa ni Bondoc, bangud sa tikang sang natungdan nga ahensya, mahimo nga maapektuhan man ang nadihon nga plano sang Western Visayas batok sa covid-19.
May kaangtanan naman sa duha nga taga- Zarraga nga nagpositibo sa Covid-19 nga sanday: WV #256, 28 anyos nga lalaki ,isa ka repatriated Overseas Filipino Worker; kag WV #258, 27 anyos nga lalaki, isa ka Locally Stranded Individual, ginpahayag ni Bondoc nga yara sa estable nga kondisyon ang duha ka pasyente nga nagapaidalom sa facility quarantine.
Suno kay Bondoc, wala naman sang contact sa community ang duha rason nga wala sang dapat nga kabalak-an ang pumuluyo sang banwa.
May kaangtanan naman sa Hatid Probinsya sang gobyerno, ginpahayag ni Dr. Bondoc nga kuntani indi lang paggulpihon ang pagpapauli sa mga nagakala-stranded nga pumuluyo.
Suno pa sa iya, nagakadapat man nga may yara sang proper orientation ang tanan nga ginapapauli.
