Makaigu pa ang suplay sang langis sa Pilipinas tubtub sa 50 ka adlaw.
Ini ang latest update nga ginhatag sang Department of Energy (DOE) as of March 27, 2026 sandig sa gin-anunsyo sa press briefing subong nga gab-i.
Mas malawig ini ipaanggid sa gin-report sang ahensya sang nagligad nga semana nga pang-45 ka adlaw na lang ang suplay sa Pilipinas.
Una na nga ginpahayag ni Executive Secretary Ralph Recto nga naka-order na ang Marcos administration sang one million barrels ukon masobra 165 million liters nga diesel halin sa lain-lain nga mga pungsod.
Sa sini nga krudo, ginkumpirma sang DOE nga ang una nga shipment magahalin sa Japan nga 22.6 million liters kag natalana na ini nga mag-abot sa masunod nga semana.
Ginpahat-pahat man ang ginapaabot pa nga deliveries sa Abril nga amo ang:
- 300,000 barrels (47.7 million liters) halin sa Malaysia kag Singapore sa temprano nga bahin sang masunod nga bulan
- 300,000 barrels (47.7 million liters) halin sa North Asia ukon India sa tunga-tunga sang Abril
- 300,000 barrels (47.7 million liters) halin sa Oman via Singapore sa katapusan sang Abril
Ginpresentar man sang DOE ang breakdown sang available days sang suplay kada fuel product nga amo ang masunod:
- Gasoline – 59.78 days
- Diesel – 46.93 days
- Kerosene – 107.88 days
- Jet fuel – 62.69 days
- Fuel oil – 57.27 days
- LPG – 34.02 days
“When you say 59 days for gasoline, that means we have almost 60 days to look for replenishment… Most of the orders coming from Southeast Asia take about a week or 10 days to reach the Philippines, so there’s more than enough time,” suno kay Energy Secretary Sharon Garin.
Padayon nga gina-engganyo ang mga Pilipino nga magkinot sang gatong samtang wala pa sang kasiguruhan kun san-o matapos ang gyera sa Middle East.#
