Ginpirmahan na ni Finance Secretary Frederick Go ang resolusyon para sa suspensyon sang excise tax sa liquefied petroleum gas ukon LPG kag kerosene.
Ginpahayag ini ni Go sa budget hearing sang Department of Finance sa Senado, matapos liwat nga ginpanawagan ni Senator Bong Go ang suspensyon sang fuel excise taxes bangod sa nagapadayon nga conflict sa Middle East.
Apang siling ni Go, wala pa sa direksyon sang gobyerno nga suspendihon man ang excise tax sa diesel kag gasolina bangod mahimo ini magresulta sa ginabulubanta nga P12-billion nga revenue loss kada bulan.
Sa baylo, ipadayon sang gobyerno ang targeted subsidies agod mabuligan ang mga apektado sang pagsaka sang presyo sang krudo.
Sa idalom sang TRAIN Law, may excise tax nga 3 pesos kada kilo sang LPG kag 5 pesos kada litro sang kerosene.
Samtang, sa idalom sang Republic Act 12316, may emergency powers ang Presidente nga suspendihon ang fuel excise tax tubtob tatlo ka bulan kon ang average price sang Dubai crude maglab-ot ukon makalampuwas sa 80 dollars kada bariles sa sulod sang isa ka bulan.
Sang Abril, ginsuspend man ang excise tax sa LPG kag kerosene, nga nagresulta sa buhin nga 3 pesos kag 36 sentimos kada kilo sang LPG, ukon halos 37 pesos kada tangke, kag 5 pesos kag 65 sentimos kada litro sang kerosene; apang gin-untat ang suspensyon sang Hulyo matapos mag-nubo sa 80 dolyar kada bariles ang average price sang Dubai crude sang Hunyo.
