ILOILO CITY- Ginalantaw sang Department of Finance (DOF) nga gamiton sang gobyerno ang Php20.3 billion nga cash reserve bilang fuel subsidies para sa kritikal nga sektor kalakip ang public utility vehicles, mangunguma,kag manugpangisda sa tion nga magtimbuok pa sang $100 per barrel ang presyo sang langis.
Suno kay Finance Assitant Sec. Valery Joy Brion, ang additional subsidies ang mahimo nga kuhaon gikan sa excess value-added tax (VAT) collection kun sa diin gintumod sini nga nakatigayon ang gobyerno nga makakolekta sang Php3 billion humalin sang Enero tubtob Pebrero.
Suno sa iya, ang excess VAT collection ang mahimo gamiton para sa subsidies sa tion nga ang presyo sang langis magpadayon sa pagtaas.
Una na nga ginpanindugan ni Sen. Sherwin Gatchalian, chairman sang Senate Committee on Energy, nga kinahanglan ang “war chest” ukon cash reserve bangud nga wala sang kasiguraduhan kun tubtob san -o magalawig ang away sa tunga Russia kag Ukraine.
Gindugang naman ni Brion nga nakakolekta man ang gobyerno sang Php143 billion gikan sa fuel excise taxes sang 2021.
Ginbalabagan sang DOF ang proposal nga pag- suspend sang amo nga tax kag sa baylo, i-recalibrate ang grant sang subsidies sa marginalized sectors.
Sang damlag lang, gindoble sang gobyerno ang budget para sa Pantawid Pasada program sa Php 5 billion.
Suno pa kay Brion, ang overall subsidies nagtaas gikan sa Php3 billion kag nangin Php 6.1 billion.
